Barnaamijkan waxaan bilaabay in aan ka qeybqaato 1991. Gabadh ka tirsan barnaamijka Bilowga Wanagsan ayaa markii ugu horreysay ila soo xidhiidhay. Gabadhaasi markii ay fahamtay in aanan fahamin luqadeeda, waxay u yeedhay gabadh Soomaaliyeed. Waxay isiiyeen cinwaanka xafiiska, waxayna ii faahfaahiyeen barnaamijka iyo sida aan taageero uga heli lahaa. Aniga oo xaafadda ku cusbaa awgeed, maan aqoon meelaha taageerada bulshada ee ii dhow ay yihiin. Waxaa dhici jirtay inaan carruurtayda geyn jiray Xarunta Bulshada ee Sandy Hill si ay u arkaan dhakhtar. Barnaamijka Bilowga Wanagsan wuxuu igu caawiyey inaan ogaado dhakhaatiirta ii dhow.

Imika sidii hore uguma xidhni barnaamijka waayo wax badan ayaan bartay. Haseyeeshee, weli waxaan leeyahay booqda qoys oo ii yimaada mar mar. Waxaan ka qeybqaataa wixii dhaqdhaqaaq ah ee bulshada ka jira, haddi ay tahay maalinjoog, shirar ama waxyaalo kale kolba sida waqtigu iigu saamaxo.

Barnaamijkan Bilowga Wanagsan wax badan oo wanagsan ayuu itaray. Sida haddii aan xanuunsanayo oo aan dhakhtar balan la leeyahay booqdaha qoyskeyga ayaa i qaada. Haddii waxa dhibaato ah ay ka timaado dhinaca dugsiga caruurta, ama aan balan la leeyahay xafiiska Welfeerka booqdaha qoyskaygu wuu iraacaa. Booqdaha qoyskaygu waxa kale uu iga caawiyaa xagga af-celinta, tarjumaada, la xidhiidhka dadka kale iyo dhinaca gaadiidka. Waxa uu igu qaadaa baabuurkiisa markaan u baahado.

Inkasta oo aanan si fiican ugu hadli karin luqada Ingiriisiga, hadana waxyaalo badan ayaan garanayaa imika. Sida waxyaalihii aan soo sheegay, kuwaas oo aan weli barnmaaijka Bilowga Wanagsan iga caawiyo. Imika xaafadda ayaan kala bartay; sidaas awgeed, waxyaalo ayaan keligay qabsan karaa. Markii ugu horreysay waxa carruurtayda dugsiga geeyay booqdaha qoyskeyga, sababta oo ah maan kale aqoon dugsiyada iyo meelaha ay ku kala yaaliin. Booqdaha qoysku waxay i waydiisay carruurta da'dooda. Markaas ayay wiilkayga oo afar sano ah dugsi geysay, gabadheydana dugsi xannaano caruur. Wax wanaaagsan ayaan kala kulmay barnaamijka Bilowga Wanagsan, tii ugu weyneyd waxay ahayd carruurta ay dugsiyada geeyeen. Balamaha dhakhtarka oo ay igeeyeen oo ay iga caawiyaan in aan dhakhtarka la xidhiidhi karo ayaa iyaguna wax aad muhiim u ah. Barnaamijkan Bilowga Wanagsan aad ayuu noolasha iigu fududeeyay.

Carruurtayda waxaan geyn jiray goobta carruurta lagu ciyaarsiiyo had iyo jeer. Goobtaas anigana waa la igu caawin jiray. Waxa la iigu bari jiray luqada Ingriisga. Goobtaas caruurta aad ayey wax u tartaa. Caruurto waxay fursad u helaan in ay carruur badan la ciyaaran. Taasi waxay ka fiicantahay in carruurta guriga lagu hayo.

Mar marka qaarkood, xiliga xagaaggii carruurta waxa loo saraa maalin joog. Waxa ay soo arkaan xoolo badan sida fardo, digaag, lo', geel,uubs, maya, maya, geelo waa Soomaaliya!!! Waxa ay carruurta maalintaas cunaan cuntooyin kala gedisan. Cuntadaas qaarkood waalidiinta ayaa diyaarisa, qaarkoodna barnaamijka Bilowga Wanagsan ayaa soo diyaariya. Arrintaasi wax weyn ayey u tahay carruurta.

Waxaan u maleynayaa in Barnaamijka Bilowga Wanagsan uu waxtar badan u leeyahay bulshada. Isbedelka uu barnaamijka Bilowga Wanagsan uu bulshada ku sameeyey waxa laga dhex arki karaa qof aniga oo kale ah. Barnaamijkan la'aantiis waxaan ku lumi lahaa wadankan weyn, caadooyinkiisa, dhaqankiisa iyo luqaddiisa aan garaneyn.

Waxaan aad ralli uga ahay waxyaalaha uu qabto barnaamijka Bilowga Wanagsan. Marka ay jiraan shirar ama waxyaalo kale barnaamijkan wuxuu hubiyaa in carruurtayda la daryeelo si aan uga qeybqaato. Haddii kale ima suurtogasheen inaan ka qeybqaato. Sida sharciga ah booqdaha qoysku waa inuu saddex jeer bishii ii yimaadaa. Haseyeeshee, haddii wax deg deg ahi jiraan, wuxuu isku dayaa in uu si dhakhso ah iigu yimaado. Waxaa dhacday in habeen aan xanuusaday oo aan u baahday in dhakhtarka si deg deg ah u tago. Waxaan telefoon u diray booqdaha qoyskeyga si uu ii geeyo cusbataalka. Wuxuu halkaas ila joogay 8dii habeenimo ilaa iyo 4tii aroornimo. Mana garananyo in waqtigaas uu ahaa mid uu lacag ku qaadanayey. Aad ayaan ugu kalsoonahay booqdaha qoyskeyga, waxa uu isiiya waqtii badan oo aan ahayn kii shaqadiisa caadiga ah. Waxa uu si aad ah ugu dadaalaa inuu i taageero.

Waxaan u sheegi karaa booqdaha qoyskeyga waxyaalo badan oo aanan cid kale u sheegi karin. Waxaan u sheegi karaa xaaladayda dhaqaale iyo haddii wax isbedel ah ama dhibaatooyin dhinca dugsiga carruurta ka yimaadaan. Waxyaalaha aan u sheegaa ma aha wax sir ah, laakin waxii baahidayda ah waan u sheegi karaa, sida haddii guriga cuntadu ka dhamaato. Waxaan Kanada imid 1992, muddadaas shanta sano ah waxaan lahaa booqda qoys. Markii aan halkan imid ninkeygu ilama socon. Waxaan ku dadaalay in uu Kanada yimaado markii aniga sharciga la ii siiyey. Waxa i caawisay Isuduwaha booqdaha qoyska oo waraaq u qortay xafiiska Imigareeshinka, Muddo toban bilood gudahooda ah, waxa loo ogolaaday in ninkeygu uu yimaado. Markii uu yimidna wax gegeda diyaaradaha ka soo qaaday booqda qoyskeyga oo guriga keenay.

Anigu uma hadli karo qof kasta oo xaafadda ku nool, haseyeeshee, barnaamiijkani waxyaalo badan oo wanagsan ayuu noloshayda ku soo kordhiyey. Haddii aanu barnaamijkani jireen indhuhu iima furmeen, waxay ibareen waxyaalaha jira agagaarkayga iyo meelaha ii dhow ee aan taageero ka heli karo. Ralli baan ka ahay waxyaalaha uu barnaamijkani qabto. Laba bilood ka hor waxaan maqlay in barnaamijku dhamaanayo. Arrintaas maan jecelaysan waayo wax badan ayaan luminayaa. Laakin imika waan maqalay in barnaamijku sii socon doono, Waxay carruurtaydu ka qeyb qaadatay dabaaldegii loo sameeyey arrintaas